النصب بأسم المنح والسفر المجاني ابو بلاش
مبدأيا انا عارف البوست دة هيزعل ناس كتير او بمعني اصح هيقطع عيش ناس كتيييييييير معتمدة علي " سبوبه " المنح ودعايه السفر المجاني عشان يشقطوا الفولورز والاعلانات-----------------------------------------------------------------
قرب قرب قرب قرب منحه يا بيه .. منحه يا هانم .. منحه يا ابو الكباتن
المنحه البريطانيه فتحت يا انييييييسسسه
منحه ال Upgrade بتاعه امريكا فتحت يا مداااااااام
المنحه الكوريه بسبعه ونص .. اصلي وصيني بسبعه ونص
قرب قرب قرب منحه تركيا مجانا .. خدي المنحه و صورة مع مهند وشاروخان هديه
الاستاذ اللي في الكنبه اللي ورا مخدش منحه ؟؟
الهانم اللي بتلعب في اختها اقصد بتلعب مع اختها مخدتش منحه ؟؟
الكابتن ابو كاب فوحلوقي مخدش منحه ؟
----------------------------------------------------------------
المنح دي يا مودام مليانه انبهارات ..
- اولا بتخليك تسافر برا ..
-- يا راجل بجد ؟؟ بتخليني اسافر برا مش جوة ؟
- عيييييب هو انا هضحك عليك يعني .. طبعا بتسافر بيها برا مش جوة
.
لا وايه بقي خد عندك الانبهار الجاي دة ... بتكون متكفله بيك في كل حاجه ومش عايزينك غير بشنطه هدومك
هتسألني طب وافرض انا ممعاييش هدوم اصلا وعريان ؟
-- تصدق فعلا انا كنت هسألك كدة !
- عييييييب هو انا تلميذ .. انا بحس بالزبون بتاعي .. افرض مرة واحد فلتان وصايع كان بايت عندك وجابلك هدوم مش هتحتاج ساعتها منحه عشان تاخدك بشنطه هدومك دي ..
-- انا كبهير انبهرت فشششششششششششخ
.
--------------------------------------------------------------
طيب سؤال معلش هما مبيطلبوش اي حاجه خالص ؟ يعني هروح اقدم فورا واخدها مجانا صح ؟
لا يا معلم بيطلبوا .. بس طلبات لا تووووووووذكر .. طلبات بسيييييييييييييطه اوي اوي
.
1- لازم يكون معاكم تويفل او ايلتس بسكور معين
والامتحان بياخد 2100 جنيه في المره الواحدة دة لو جبت الاسكور اساسا من اول مرة
.
و اي حد بيدخل الامتحان دة علي الاقل مرتين تلاته عشان يجيب الاسكور شوف بقي هتدفع كام الف جنيه في الامتحانات و هتضيع وقت قد ايه عشان تذاكر الانجلش اصلا وتحضر للامتحان
.
دة كل دة من غير ما تاخد كورسات اهو ولا اي دروس ف الانجلش يعني يادوب هتتعامل بالانترنت .. ما بالك بقي لو هتاخد كورسات شوف هتدفع ميزانيه قد ايه
.
يعني عشان تجيب الاسكور تخشلها ف 6000 ولا 7000 جنيه .. كلام فاضي ياجدع ميجيبوش علبه كشري دلوقتي
.
2- لازم تكون متميز وتقديرك عالي
وعشان تكون متميز وتقديرك عالي لازم هتقعد تدح ايام ثانوي ( لو منحه بكالريوس ) وتدفع فلوس دروس بمئات الالاف اساسا عشان تعرف تجيب سكور فوق ال 90 %
.
او هتدح ايام الجامعه ( لو منحه ماجستير ) وبرضو هتدفع فلوس كتير فشخ في الكورسات عشان تجيب ال GPA اللازم
.
بقولك كلام فاضي ياجدع كام واحدة امتياز علي شويه جيد جدا وهتوووورررررررزق صدقني هتووووورررزق
.
3- لازم تكون بتشتغل في اعمال تطوعيه كبيره وتاخد منهم شهادات بكدة وعشان تشتغل في الاعمال دي لازم يكون معاك وسايط كتيره فشخ عشان تدخل المؤسسات الكبيره دي
( يعني مؤسسات صناع الحياه وصناع البتنجان دي متنفعش ومتاكلش مع المنح ) عايزين مؤسسات كبيره وشهادات رسميه
.
4- لازم اتنين دكاتره من جامعتك او من مدرستك ( لو مقدم ع بكالريوس ) يشهدوا ليك بحاجه اسمها خطاب توصيه ولازم يكونوا بيدرسولك في تخصصك مباشره
.
هتسألني طب وافرض الدكتور اصلا اللي هيوصي عليك معندوش نت ؟
سهله تركبله سلك نت .. مش محتاجه ذكاء دي .. وتجبله كوبايه نسكافيه او هوت شوكليت لو الدكتورة بنت عشان تعرف تكتب خطاب التوصيه بمزاج
وتجبلي رقم الدكتورة دي بالمره لو حلوة الله يباركلك
-------------------------------------------------------------
شوفت بقي المنح دي سهله ازاي واي حد يقدر يقدم عليها ويسافر من غير ولا مليم
- اه طبعا دي سهل فشخ .. سهله اوي .. سهله خالص .. مش محتاجه اي مليم فعلا بس معلش سؤال حازز في نفسيتي ولازم اسأله انت جربت المنحه دي قبل كدة وسافرت من خلالها ؟
-- لا انا جبتها من ع النت بس وجبتلكم اللينك شوفت انا بتعب قد ايه
- يعني انت اصلا مسافرتش من خلال المنحه دي طول حياتك !
-- لا يا معلم بقولك جبتها من ع النت وشوفت كام فيديو عنها فقولت استفيد منها واعمل مصلحه وانزل بوست واكتب تحت البوستات " بتاع المنح " أو " سفير السعادة " بس ياريت شيييير كتير بقي عشان البوست يسمع ويتعرف الاكونت بتاعي
- طب ممكن تقفل الباب لو سمحت
-- ليه يا معلم ؟
- هنرقص دانس مع بعض وحياه خالتك
----------------------------------------------------------
القصد من البوست مش اننا نعقد الناس ولا نحبطهم .. لكن عشان نوضحلهم حقيقه ان عشان تسافر لازم تتعب .. لازم تعرق .. لازم تبذل مجهود وتدفع فلوس
مفيش سفر مجاني .. مفيش سفر بدون تعب .. مفيش سفر لواحد قاعد علي الكنبه طول اليوم
.
ناس بتكسب ملايين من الاعلانات والضحك علي عقول الشباب بالسفر السهل المجاني ابو بلاش ويسافروا هما شخصيا ببلاش من السبونسرز بتاعهم
وانت قاعد تصقفلهم وتضربلهم تعظيم سلام ومبتاخدش منهم حاجه .. هو انت بتاخد الصراحه .. بس مش منح
0 comments:
Post a Comment