ازاي تظبط كشف حسابك البنكي عشان تقدم علي الشنجن

 

مبدأيا كل الناس اللي بينصحوا في النقطه دي هتسمعهم بيقولوا جمله محفوظه اللي هي " مش مهم المبلغ النهائي المهم يكون فيه حركه سحب وايداع "
بس مفيش ولا اي واحد منهم حاول يفسرلك اي هي نوع الحركه دي

اول غلطه الناس بتعملها انها تفضل تعمل سحب وايداع عمال علي بطال كل كذا يوم .. تودع وتسحب تودع وتسحب تودع وتسحب ايمانا منهم ان كدة هيثبتوا انهم جامدين زوحليقه للسفارات
وان ليهم حياه مستقرة وبتاع .. علي اساس انك بيل جيتس مثلا وفلوسك رايحه جايه كل يوم وانت عايش في مصر ما شاء الله

لازم تعرفوا ان السفارات مش عبيطه .. لان اساسا انت كنت بتحط المبلغ ليه من الاول لما انت عارف انك هتسحبه بعدها؟

طيب امال نعمل ايه؟

حضرتك هتيجي علي يوم ثابت في الشهر .. يوم 1 مثلا او يوم 10 او يوم 20 .. المهم انك تثبته باستمرار في كل الشهور

وهتيجي في اليوم دة من اول كل شهر هتودع مبلغ كبير جدا مثلا 7000 جنيه .. وتودعه بانتظام في نفس اليوم من اول كل شهر

وهتعمل فيزا بنكيه مرتبطه بالحساب ( كريديت او ديبيت ) .. وطول الاسبوع هتسحب و تشتري بالفيزا دي كل مشترياتك .. وبعدين في خلال الشهر تودع 3 ايداعات كمان كل اسبوع فقط المرة دي في ايام مختلفه

مثال: ايداع 7000 في اول كل شهر بعدها بأسبوع اسحب ٥٠٠
اسبوع كمان ٧٠٠ وهكذا وفى نص كل أسبوع اعمل مشتريات أو هات أكل من كنتاكى ماك وستاربكس وخلى كل تعاملاتك بالفيزا شحن رصيد أى حاجه بالفيزا .. .كل شهر اعمل كدا

ليه عملنا كدة ؟ عشان تثبت ان ليك مرتب ( حتي لو مبتشتغلش ) بيتحولك كل اول شهر علي حسابك في يوم محدد .. وانت بقي بالمرتب دة بتاخد كل اسبوع اللي يكفيك في معيشتك وبتشتري بالكريديت كل مشترياتك وبتسيب الباقي في الحساب

ولو ودعت بعد كدة اي ايداعات هتبقي دي كأنها مصدر صرف خارجي من شغل خاص ليك

كدة بعد 6 شهور بالمنظر دة هيبان انك في يوم 1 مثلا من اول كل شهر بينزلك مرتبك في البنك ( معناها انك بتشتغل ومستقر حتي لو انت اصلا مش شغال ) وبالكريديت هيبان في كشف الحساب اللي هتجيبه انك بتشتري وبتسحب من مرتبك ولو بتودع هيبان انه ايداع من شغل خاص

كمان نوع المشتريات بالكريديت بيفرق في التقييم .. طول ما انت بتشتري من مواقع معروفه دة بيزودك في التقييم

ملحوظه : لو انت مبتشتغلش بنك القاهرة وبنك الكويتي مبيطلبوش اي اثباتات انك بتشتغل فتقدر عادي تفتح حساب بدون ما تكون شغال عكس CIB و QNB

اللي عندة اسئله يتفضل لغايه ما اكتب بوست ازاي تظبط الاتش ار ليتر

شاركه على فيسبوك شاركه على تويتر شاركه على جوجل بلس

عن Sciencelover