و الفندق هو اللي بيحدد السعر االاصلي والموقع الوسيط زي بوكينج بياخد من 3 ل 7 % من سعر الحجز
.
في اقوي 3 مواقع في التاريخ للبحث عن الفنادق ..
7agz Fondoq .com
التاني اسمه Hotels Combined .com
التالت اسمه Ya Msafr .com
.
المواقع دي ( اول 2 خصوصا ) وظيفتهم انهم بيجيبوا لك كل الفنادق ويقارنهالك من علي كل مواقع حجز الفنادق ..
يعني ممكن مثلا تلاقي فندق من علي expedia مش موجود علي بوكينج او ارخص من بوكينج
أو تلاقي فندق من علي بوكينج ارخص او مش موجود علي trivago .. وهكذا وهكذا
.
وانت طبعا مش فاضي والفراغ قاتلك لدرجه انك تفتح كل مواقع حجز الفنادق والمواقع الوسيطه وتدور علي ارخص فنادق في كل موقع لوحده ! انت كدة عايز مليون سنه عشان تلاقي سعر مناسب
.
عشان كدة وظيفه موقع hotels combined أو موقع 7agz Fondoq انهم هيجيبو لك كل الفنادق ويقارنلك اسعارهم مع كل مواقع الحجز وبالتالي هتعرف تجيب احسن سعر للفندق من علي احسن موقع للحجز
.
بعد ما تدخل عليهم هتستخدم كل الفلاتر اللي علي الشمال ,,
.
يعني ايه كلمه فلتر ؟؟
معني كلمه فلتر يعني قوائم للاختيار موجودة فيها كل مواصفات الفنادق وانت وظيفتك انك بتفلتر النتائج يعني بتختار النتائج اللي تناسبك وتستبعد اللي مش يناسبك لتقليل نتائج البحث ..
.
مثلا هتلاقي فلتر عن التقييمات وعدد النجوم
( النزلاء بيعطوا تقييمات حسب اللوكيشن بتاع الفندق ,, حسب وسائل الراحه فيه ,, حسب الخدمات من اصحاب الفندق ,, الخ الخ )
هتلاقي فلتر تاني عن متوسط السعر وميزانيتك قد ايه
هتلاقي فلتر ثالث عن نوع المكان اللي عايز تنزل فيه هل فندق ولا ريزورت ولا فيلا ولا بيت شباب
هتلاقي فلتر رابع عن تسهيلات الفندق زي مثلا هل في واي فاي ولا مطعم ولا باركينج ولا صاله جيم ولا توصيله من المطار للفندق الخ الخ
اقعد العب في كل الفلاتر دي عشان توصل للفندق اللي يناسبك ويناسب احتياجاتك
.
وبعد ما تخلص فلتره هيطلعلك النتائج النهائيه المتفلتره من علي كذا موقع للحجز وانت تبدأ تشوف فندق فندق وتدخل علي الموقع بتاع الفندق نفسه وتشوفه وتشوف مواصفاته ومواصفات الغرفه وتقييم الناس ليه و نوع الغرفه اللي هتاخدها و التسهيلات اللي فيها الخ الخ .. وطبعاااااااااااا اهم حاجه الخريطه .. الخريطه و جوجل مابس في السفر هي ايديك و رجلك .. من غير خريطه و جوجل ماب انت هتبقي محتاس وضايع برا مصر
يعني لازم تشوف خريطه المكان كويس اوي وتحفظ العنوان بتاع الفندق وازاي تروحله .. وبعدين تحجز ..
.
اهم نصيحه وانت بتحجز انك لازم تقري شروط الحجز كويس اوي اوي خصوصا فيما يتعلق بال free cancelation وهو الالغاء المجاني للحجز لان ياما ناس لبست في الحيط بسبب انها مبتقراش شروط الحجز كويس
-------------------------------------------------------------------------
تحجز الفنادق اونلاين ولا مع شركه سياحه احسن ؟؟؟؟
عشان ننهي النقطه دي اللي فيها جدل كتير جدا
اغلب شركات السياحه بيكونوا متفقين علي سعر معين مع الفنادق والفندق بيديلهم سعر ارخص وبالتالي هو هيبيع ليك بسعر ارخص
.
لان الشركه بتاعه السياحه بتتعامل مع الفندق مباشره وعلي اساس انهم شركه بيبقي ليهم سعر اقل من سعر الفندق نفسه ... يعني مثلا لو انت ك سائح كلمت الفندق هيديك السعر 1000 مثلا وبيدي شركه السياحه السعر 800 تقوم شركه السياحه تبيع ليك ب 900 ويبقي كده كل الاطراف كسبت .. انت كسبت سعر اقل من سعر الفندق ,, الفندق كسب انه باع كل الغرف ,, شركه السياحه كسبت انك اتعاملت معاها وخدت كوميشن وباعت ..
.
كمان في ميزه تانيه كبيره اوي لشركات السياحه
ناس كتير حجوزاتها بيعملوها اون لاين ويحبوا يعملوا ريفاند والاونلاين بتبقي الرولز بتاعته ان الحجز ما بيرجعش .. لكن لو حجز مع شركه .. الشركه بتعرف تتكلم مع الفندق وتقدر في اغلب الاحوال ترجع جزء كبير
.
طيب وانا اعرف ازاي ان الشركه هتعرف تجيب لي سعر اقل من الفندق !!!! مش جايز بينصبوا عليا وهيبعولي بسعر اعلي من الاونلاين ؟؟؟؟
حضرتك ببساطه هتحجز الفندق اللي انت عايزة في الفتره اللي انت عايزها من اي موقع حجز وليكن بوكينج مثلا وتخليه free cancellation وبعدين تروح لشركات السياحه
.
جابولك سعر ارخص من السعر اللي انت حجزته من بوكينج ( بعد عموله الموظف بتاعهم طبعا ) يبقي تكنسل الحجز بتاعك وتحجز مع شركه السياحه دي
.
لكن لو لقيت سعر شركه السياحه هو هو نفس حجز بوكينج او اغلي يبقي تفكس ليهم وتكمل بالحجز اللي معاك اللي حجزته من الاول
----------------------------------------------------------------
حركه صايعه في الحجز ميعملهاش الا اللي قلبه جامد ومستبيع ومعندوش اسره :
متحجزش فندق قبل ما تسافر .. هتحجزه بعد ما تسافر
يعني بعد ما توصل البلد اللي انت رايحها بالسلامه هتبدأ تروح الفنادق اللي ف البلد علي رجلك وتقولهم انا عايز غرفه فاضيه عندكم
.
ليه تعمل كدة ؟؟
عشان الغرف اللي مش محجوزة مسبقا دي بتبقي ارخص بكتير من انك تحجز من بوكينج مثلا لان بوكينج بياخد ضريبه لكن لما تحجز من الفندق فيس تو فيس مبياخدش فلوس الضريبه دي يعني فلوس الحجز بتكون ارخص كتير جدا جدا
.
طب افرض صاحب الفندق قالك اوك هحجزلك الاوضه الفاضيه بس قالك هحجزلك الغرفه بسعر اغلي من اللي مكتوب علي بوكينج ؟؟
ساعتها هتقوله ثانيه واحدة وتقوم مطلع الموبايل ومشغل النت وداخل حاجز من علي بوكينج وانت واقف وتديله الحجز في وشه وتبقي برضو خدت الاوضه بسعر رخيص :")
جاي تعملهم علينا ؟ دة احنا اتهرينا
.
طيب ايه خوازيق الموضوع دة ؟؟
الخازوق طبعا انك متلاقيش غرف فاضيه وبالتالي تقعد تلف في الشمس علي كذا فندق وممكن تنام ف الشارع لو ملقتش وعشان كدة منصحش بالحركه دي ل الاسر واللي معاهم اطفال
-------------------------------------------------------------------
ناس كثير امبارح قالتلي اعمل هاشتاج عشان نوصل للبوستات بتاعتك اسرع .. اقترحوا عليا في الكومنتات اسم هاشتاج احطه في كل بوست انزله بعد كدة
اقعدوا بالعافيه
0 comments:
Post a Comment