أسهل طريقة للسفر شبه المجاني للاتحاد الاروبي (au-pair)

مش معاك فلوس وسنك صغير ومش دكتور ولا مهندس وعايز تسافر بطريقه شبه مجانيه ومش لاقي منح تساعدك عشان تقديراتك ضعيفه ؟؟؟

تعالي شوف الطريقة دي

هنتكلم النهاردة عن اسهل طريقه للسفر الشبه مجاني ف العالم وهي ال au-pair

ال au-pair عباره عن اسره من دوله معينه بتحتاج حد يساعدهم في شغل البيت وتربيه الاولاد وانه ياخد باله منهم ومن بيتهم .. مساعد للأسرة

طيب انت ك واحد ايه المميزات اللي هتعود عليك لو عملت ال au-pairدة ؟؟

1- السكن والاكل والشرب مجانا عليهم

2- بيدفعولك شهريا مصروف ايد

3- بيدفعولك جزء من مصروف كورس اللغه اللي بتاخده طول فتره اقامتك معاهم وفي بعض الاسر بيدفعولك ثمن الكورس بالكامل

4- بيكون ليك تأمين عليهم والتأمين بيكون للحاجات المؤقته

5- اوقات كتير جدا بعض الاسر بتدفعلك تذاكر الطيران كمان

6- ليك يوم في الاسبوع free ليك من غير شغل تتفسح فيه ف البلد

مين اللي ممكن يشتغل في ال au-pair دة ؟؟ وايه شروطها ؟؟

1- غالبا الاسر بتطلب البنات لكن ممكن ولاد كمان عادي يطلبوهم

2- السن ميتعداش 30 سنه .. وفي بعض البلاد زي المانيا ميتعداش 27

3- المدة بتبقي من 6 شهور ل سنه

4- مش شرط خبره ابدا لكن لازم تكون محب للاطفال وبتعرف تراعيهم

5- مش مسموحلك وانت هناك معاهم تبع ال au-pair انك تشتغل ازيد من 30 ساعه في الاسبوع يعني بمعدل ست ساعات فقط يوميا

6- كل بلد السفارات بتحط شرط من عندها عشان تديلك فيزا تبع ال aupair

مثلا ف المانيا لازم يكون اقل مستوي لغه الماني يكون عندك هو A1 مفيش اقل من كدة ويكون بشهادة معتمدة من جوته

ف استراليا لازم يكون معاك شهادة ايلتس بمستوي 6.5 توتال تثبت انك بتعرف انجليزي عشان السفاره تديك الفيزا

وهكذا ف كل بلد

الحاجه المهمه جدا جدا جدا انك هتلاقي كل اسره حاطين شروط العقد بينك وبينهم لازم تقراها كويس قبل التعاقد عشان لو اخليت باي بنود منها هتتعاقب هناك

.

ايه الاجراءات طيب عشان اروح تبع ال au-pair ؟؟

هتدخل ع الموقع الرسمي بتاع ال Au-pair world . com وهتعمل اكونت وبروفايل تحط فيه كل معلوماتك ومؤهلاتك ولغاتك وتبدأ تراسل الاسر ف الدوله ال انت عايز تروحها وهما عاملين غرف شات زي رسايل الفيسبوك كدة بالظبط .. الاسرة اللي بتقابلك بتبعتلك دعوة ال au-pair من الموقع وبيختموها من البلدية وبيعتلك نسخة من كشف الحساب الخاص بيهم و صورة من ال ID بتاعهم وكمان صورة من التأمين الصحي والاجتماعي بتاعهم

وانت تاخد كل الورق دة وتروح السفاره تقدم ع التأشيرة عماله منزليه ( ف كل السفارات معترفين بالنوع دة عادي )

.

معقول الدنيا وردي كدة مفيش خوازيق ابدا ؟؟

الفكره كلها ان معظم الاسر بيكونوا عايزين حد فورا عشان يرعي البيت ويرعي ولادهم عشان كدة اغلبهم مش بيختار حد من الشرق الاوسط عشان مش يستنوا وقت طويل علي ما انت تاخد معاد من السفاره وتقدم الورق وتروح وتوصل وتتأقلم وموال كبير

ف بيستسهلوا انهم بيجيبوا حد من الاتحاد الاوروبي جنبهم من النمسا ولا سويسرا اقرب

لكن اسعي وربنا يكرمك متعرفش الخير فين ولا الرزق منين .. واعرف مصريين كثير جدا بيطلعوا ع النوع دة كل سنه

شاركه على فيسبوك شاركه على تويتر شاركه على جوجل بلس

عن Sciencelover