البوست التاريخي ل ازاي تظبط كشف حسابك البنكي عشان تاخد فيزا ال UK :

  اولا اود ان اشكر د/أحمد محمد علي المعلوماته القيمة

سفاره انجلترا هي الامتداد التاريخي لفكره الُمدعي الاشتراكي

و مخترعي فكره ( من اين لك هذا ) .. عايزين يعرفوا كل مليم وكل سحتوت دخل حسابك ودخل ليه وعشان ايه ومنين وبيقارنوا ما بين دخلك الشهري والرصيد الاجمالي مع حركه الايداعات الشهريه مع المبلغ ال هتصرفه في رحلتك مع المبلغ ال هيفضل في حسابك بعد انتهاء رحلتك

من الاخر كدة ظبطت كشف حسابك هتاخد فيزا UK .. تظبطه ازاي ؟

1- مبلغ ايداع ثابت ( اللي هو مرتبك ) يتحول علي حسابك في يوم ثابت كل شهر
ولو بتقبض كاش أو انت فريلانسر مثلا .. ساعتها تجمع الفلوس الكاش دي وتروح تحطها بأيدك في البنك في يوم ثابت كل شهر وتكتب في الاتش ار انك بتقبض كاش
.

2- بلاش تسحب مرتبك مرة واحدة فقط في الشهر لأنك كدة بتخلي حسابك راكد ومفيهوش حركه باقي ايام الشهر .. يعني مثلا مرتبك 3000 جنيه .. متروحش يوم 1 مثلا تروح تسحب ال 3000 كلهم! ما انت كدة هتخلي حسابك راكد باقي ايام الشهر لغايه الشهر اللي بعديه

سحب الفلوس يكون علي دفعات اسبوعيا .. وهتخلي تعاملاتك في السحب والصرف بالفيزا كارد .. يعني مثلا هتسحب بالفيزا يوم 1 في الشهر 900 جنيه من مرتبك .. يوم 8 مثلا تسحبلك 900 كمان .. يوم 16 تسحبلك 900 كمان وهكذا ..

تشتري مشترياتك ( سواء اونلاين او من المحلات ) بالفيزا .. تدفع فواتيرك علي النت بالفيزا .. تشحن رصيدك بالفيزا .. وهكذا .. من الاخر تحسسهم انك عايش حياه طبيعيه ومستقره في مصر .. بتقبض فلوس .. وتصرف منها اسبوعيا حسب احتياجك وتشتري حاجتك وتدفع فواتيرك وتصرف من مرتبك .. طيب هيعرفوا ازاي انك بتعمل كل دة وحياتك مستقرة مش عليك ديون مثلا وبتسدد فيها وعايز التأشيرة عشان تهرب ؟ ببساطه الاثباتات هتكون لما تتعامل بالفيزا كارد .. كل التعاملات دي هتبان في كشف حسابك .. التعامل الكاش مش هيثبت حياتك دي! عشان كدة لازم تحول كل حياتك للفيزا علي الاقل لغايه لما تاخد التأشيرة وبعدين يا سيدي اعمل ما بدالك
.

3- هتخلي جزء من مرتبك يفضل في حسابك كل شهر ( كأنك بتحوش ) عشان تتراكم الفلوس في حسابك ويتكون رصيد اجمالي مناسب بعد فتره

طيب افرض مرتبك ضعيف ومش هتعرف تحوش منه .. و حد هيسلفك مبلغ كبير تحطه في حسابك .. ساعتها لازم لازم لازم تحط المبلغ دة قبل فتره كبيرة من تقديمك ع الفيزا متحطهاش قبل ما تقدم ع الفيزا بمدة قصيرة .. بمعني مثلا لو هتقدم علي الفيزا في شهر 7 مثلا .. تقوم انت من شهر 1 تاخد الفلوس الكبيرة دي تحطها في حسابك وترميهم .. ولما تتراكم الايداعات والسحبات الشهريه علي حسابك لمدة 6 شهور هيصبح المبلغ الكبير اللي اتحط في الاول دة مبيشكلش اي مشكله او مصدر شك فيك وتبقي حققت المعادله الصعبه ( مبلغ اجمالي كبير في حسابك وكمان بقي عليه تعاملات كثيييير جدا وحساب منطقي غير قابل للشك )
.

4- متعملش سحب وايداع عمال علي بطال .. يعني بلاش كل يوم تروح تحط فلوس و هوووب تاني يوم تروح تسحبهم تاني وتفضل تعمل كدة طول ايام الشهر وفاكر انك كدة الواد الفشيخ ال بيحرك الحساب بتاعه .. للاسف هتاخد رفض رباعي الابعاد لانها بتبقي مفقوسه اوي انك بتعمل كدة عشان تعمل حركه وهميه علي الحساب بتاعك .. بالعقل وبالمنطق القنصل هيقول انت بتحط الفلوس ليه في البنك لما انت عارف ومتأكد انك هتسحبهم بعد كام يوم .. ما كنت تخليهم معاك في جيبك وتصرفهم بالمره اسهل واسرع .. احترم ذكاء ال قدامك عشان ال قدامك يحترم ذكائك
.

4- بلاش تعمل ايداعات اكثر من اللازم .. الايداعات دي هتتقارن مع مهنتك و وظيفتك .. يعني مثلا متكونش موظف حكومه وبتحط في حسابك كل اسبوع كام الف جنيه .. هتقول وهما مالهم دي فلوسي وانا حر فيها .. لا للاسف انت مش حر انت لازم تثبت مصدر ايداعاتك دي مقارنه مع وظيفتك .. هل انت بقي هتقدر تجيبلهم كل قرش دخل ف حسابك دخل منين ؟؟ اكيد لا يعني .. يبقي مندخلش نفسنا في متاهات .. الايداع المنطقي بيكون اتنين فقط : ايداع اساسي بتاع مرتبك في يوم ثابت في الشهر .. و ايداع اضافي كل شهر لمدة مرة واحدة فقط او مرتين بالكثير في ايام متفرقه من الشهر كأنه عمولات او اوفر تايم او شغل بعد الظهر .. كدة مبلوعه ..

الا في حاله واحدة فقط الايداعات الكثيرة المستمرة تبقي مفيدة ليك .. لو كان ليها مصدر معروف ومش انت ال بتودعها تكون بتتحولك من مؤسسات وجهات تانيه .. زي مثلا واحد مبرمج بيتحوله مبالغ مستمرة من جوجل وابل ومصادر معلومه وهتبان في كشف الحساب .. ساعتها بس تبقي مصدر قوة .. لكن اي حاجه تانيه يبقي لأ
.

5- لو هنفترض انك هتصرف كل يوم في انجلترا 100 استرليني مثلا .. وهتقعد هناك اسبوع .. يعني متوقع انك تصرف 700 سترليني .. متروحش بقي تقدملهم بكشف حساب فيه 700 سترليني فقط !! لأن مفيش بني ادم عاقل في الدنيا هيروح يصرف كل ال حيلته ورصيده في البنك يبقي صفر بعد ما يرجع عشان يتفسح في بلد واحدة فقط !!! مفيش حد بيعمل كدة .. دة كدة دليل انك هتموت علي الفيزا وعايز تعمل اي حاجه عشان تاخدها حتي لو هتشحت بعدها و حسابك البنكي هيبقي صفر بعد ما ترجع

طيب تعمل ايه عشان يبقي الحركه دي منطقيه ؟؟ لو مثلا متوقع انك تصرف 700 استرليني ف اسبوع .. يبقي ساعتها قدملهم كشف حساب فيه 1400 سترليني يعني الضعف .. بحيث لما السفاره تعمل حسبتها تلاقي انك بعد ما ترجع من عندهم هيتبقي في رصيدك فلوس كثير وبكده هتبقي منطقي انك راجل رايح تتفسح في UK ومش هامك ان فلوسك تنقص من الرحله دي
.

6- لو انت صاحب شركه هتقدم كشف حساب الشركه اللي بتبين حجم تعاملاتها علي مدار الكام سنه ال الشركه اشتغلت فيهم ويكون متناسق مع السجل التجاري .. يعني ميكونش السجل التجاري لسه معمول من كام شهر وكشف حساب الشركه يكون فيه نص مليون مثلا .. للمره التانيه احترم ذكاء القنصل عشان هو كمان يحترم ذكائك ..

وممكن تقدم كشف حسابك الشخصي مع كشف حساب الشركه بس المهم تظبط الاثنين طبقا لكل النقط ال شرحتها دي
.-----------------------------------------------------------

الكلام ال بقوله دة مش صعب ولا هو قصه امنا الغوله .. دة كلام بيعمله تلقائي الناس ال شغالين في وظائف محترمه وبيقبضوا مرتب محترم وبيعيشوا حياتهم عادي .. فلو انت واحد من الناس دي يبقي مليون % البوست دة مش ليك وهيبقي مضيعه وقت بالنسبالك انك تقراه لأنك اولريدي هتكون بتعمل كل دة من غير نصائح من حد وبشكل تلقائي كمان ..

لكن البوست دة انا كتبته للناس ال ورقهم مش مظبوط ..
للناس ال ميعرفوش نمط الحياه دي ( ال هو المفروض يكون نمط حياه اي بني ادم ع الكوكب )
لظروف خارجه عن ارادتهم ( محدش هيكون ف ايده يعيش حياه كريمه ويقول لأ ) .. فالبوست دة ليهم عشان يظبطوا امورهم ويسافروا ويتفسحوا

لكن لو هتكسل انك تعمل الحاجات دي وعايز تدور علي السكك الشمال والحاجات السهله السريعه زي ضرب كشف الحساب او واحد صاحبك يقولك انه معاه واسطه في السفاره وانه جوز ام القنصل البريطاني وهيظبطك .. وجو فيلم همام في امستردام دة .. يبقي خليك في مكانك تألم في صمت غير مأسوف عليك
.

اخيرا البوست دة هو تجميع مني ل خبرات كلا من Steven Gerrard Bergkamp , Hend Salem في انجلترا علي مدار سنين

انا لا سافرت انجلترا ولا قدمت ع فيزا انجلترا ولا حتي شفت المطار اساسا .. الناس دي هما اللي علموني الكلام ال فوق دة كله في كذا سنه قعدتهم هنا

فرجاءا محدش يحسسني اني ابن بطوطه او جبت الديب من ديله .. انا مجرد انسان بعرف اجمع واستف المعلومات واظبطها في صورة بوست مفيد ..لا اكثر ولا اقل .. لا عمري كنت رحاله ولا هكون .. فرجاءا كفايه نفخ ف البلونه وادوا السوكسيه والمدح للناس ال تستحقه و لصحاب الفضل الحقيقيين

وبلاش تعملوا من الهلافيت قيمه لمجرد كام بوست عجبوكم عشان متزعلوش بعد كدة لما يتنططوا عليكم .. معلش كلمتين كانوا محشورين وكنت لازم اقولهم

شاركه على فيسبوك شاركه على تويتر شاركه على جوجل بلس

عن Sciencelover